Cid

Cantar I: Cantar del Destierro

1.

De los sos ojos tan fuertemientre llorando
tornava la cabeça e estavalos catando.
Vio puertas abiertas e uços sin cannados,
alcandaras vazias sin pielles e sin mantos
e sin falcones e sin adtores mudados.
Sospiro Mio Çid ca mucho avie grandes cuidados.
Ffablo Mio Çid bien e tan mesurado:
«¡Grado a ti, Sennor, Padre que estas en alto!
¡Esto me an buelto mios enemigos malos!»
Alli pienssan de aguijar, alli sueltan las rriendas.


2.

A la exida de Bivar ovieron la corneja diestra
e entrando a Burgos ovieronla siniestra.
Meçio Mio Çid los ombros e engrameo la tiesta:
«¡Albriçia, Albar Ffannez, ca echados somos de tierra!».


3.

Mio Çid Ruy Diaz por Burgos entrava,
en su conpanna LX pendones.
Exienlo ver mugieres e varones,
burgeses e burgesas por las finiestras son,
plorando de los ojos tanto avien el dolor.
De las sus bocas todos dizian una rrazon:
«¡Dios, que buen vassalo! ¡Si oviesse buen sennor!»